ACA convoca una manifestación n'Uviéu contra la especulación urbanística
Redacción - http://www.asturies.com
01/12/2006 L'Agrupación de Colectivos Asturianos (ACA) qu'axunta a más de 20 asociaciones de vecinos y asociaciones culturales de toa Asturies, convoca pa esti sábadu día 2 d'avientu manifestación de protesta que va celebrase'l sábadu 2 d'avientu baxo'l lema "la especulación destruye Asturies". La manifestación va salir a la 1 de la tarde de la estación de la RENFE de la capital asturiana.
El manifiestu de convocatoria presenta la marcha cívica como una protesta "contra la invasión del lladrillu, la destrucción del patrimoniu y la corrupción política asociada a ello" y mui especialmente "Escontra les centrales de ciclu combináu que van invadir Asturies y que nun quieren en nenguna otra comunidá autónoma y escontra los tendios eléctricos que s'imponen a los vecinos arrasando los nuestros montes pa sacar una enerxía que mos obligen a producir pa abastecer al restu d´España y que solo provoca daños y contaminación n´Asturies ensin crear nin una migaya riqueza y hipotecando el nuestru futuru y salú".
Les organizaciones de l'ACA concueyen en que'l campu y la costa asturianos tan "nuna situación crítica" que vien por culpa del "modelu territorial imperante, qu'afala un progresu que beneficia a unos pocos col dañu pa la mayoría, sobremanera les zones rurales" concluyendo qu'ello lleva a "la desapaición de l'Asturies que conocemos" al empar que denuncien la "indefensión cada vegada mayor" en que se ven asociaciones, colectivos y persones individuales énte l'agresión al territoriu y énte l'actuación nesti sentíu de la mesma Alministración asturiana" afirmando que tan cansos de que-yos toque ser la parte feble en casos de favoritismu, ocultación de datos y corrupción política, polo que reclamen tresparencia nes actuaciones urbanístiques.
La manifestación, convocada va yá a primeros de payares, va tener llugar na mesma selmana en qu'un de los colectivos más activos dientro d'ACA, l'Agrupación de Vecinos y Amigos de Llanes (AVALL) dio anuncia de que va presentar denuncia énte la fiscalía del Tribunal Superior de Xusticia d'Asturies por supuestu delitu de prevaricación por parte del Conceyu de Llanes y de la Comisión d'Urbanismu y Ordenación del Territoriu d'Asturies (CUOTA) pola aprobación del Plan urbanísticu de Llanes. Les acciones d'AVALL van centrase na urbanización de La Talá, sitiu de gran interés paisaxísticu y ambiental onde se cuenta con llevantar 450 viviendes.
Amás d'Amigos y Vecinos de Llanes (Avall), l'Asociación de vecinos "Sueve Verde" de Colunga, les Asociaciones de Vecinos d'Outur, Barcia y Cadavéu, en Valdés, la Plataforma pa la defensa de la Zona Rural de Xixón, Asociación Vecinal Parres; Asociación Vecinal Lieres-Solvay de Siero, l'Asociación de Vecinos San Cristóbal de Valdés, la Plataforma vecinal Oru Non de Salave, en Tapia, Asociación "Siglo XXI" de Muros de Nalón; Asociación Vecinal de San Xuan de l'Arena o l'Asociación Vecinal Santa María del Mar de Castrillón son tamién dellos de los colectivos que participen nesta plataforma.
